Heimsókn frá Íslandi.

Já gott fólk. Helgin var hreint út sagt frábær. Ég fékk pabba og Erlu í heimsókn og við höfðum það virkilega gott og gaman. Á laugardagskvöldinu fórum við út að borða á stað sem er bara búinn að vera starfandi frá árinu 1683. Þjóninn sem sinnti okkur leit nú út fyrir að hafa verið frá þeim tíma. Hann var með eindæmum fýldur greyjið, en svo rættist úr manninum og þetta var bara fínt.
Maturinn sem við fengum var alveg frábær. Fengum svona "mini-jólahlaðborð". Algjör snilld eins og sagt er. Upp úr stóð líklega reykti állinn sem við fengum og svo Ris a la mande með alveg himneskri kirsuberjasósu. Með þessu fengum við jólabjór frá Albani ölgerðinni hérna í Odense og eitthvað fengum við okkur af snöfsum, Álaborgarsnafs. Verulega gott allt saman...myndir á eftir.

Á sunnudeginum fórum við svo á jólamarkað í miðbænum ásamt Sólrúnu og krílunum. Það var alveg indælt. Við fengum okkur svo smá snæðing í hádeginu og þar fékk ég alveg hrikalega góða andalifrarkæfu og geitaost. Já, ég veit ég tala mikið um mat.
Eftir matinn röltu Erla og Sólrún aðeins um bæinn einar og fóru í smá verslunarleiðangur á meðan ég, pabbi og börnin kíktum nánar á jólamarkaðinn.
Þessi markaður var ansi skemmtilegur því út um allt var fólk klætt í fatnaði frá þeim tíma þegar HC Andersen blessaður stundaði meiri súrefnisinntöku en hann gerir í dag. Þarna voru líka persónur úr sögum fyrrnefnda HC. Stúlkan með eldspýturnar var þó eitthvað betur klædd í þetta skiptið og sama má segja um Keisarann góða í nýju fötunum sínum.
Það er ljóst að ég skelli mér á þennan markað aftur fyrir næstu jól.

Sólrún bauð svo í mat í gær og það var einstaklega gott. Hún gerði þennan fína gúllaspottrétt og með þessu auðvitað jólabjór hvað annað.

Pabbi og Erla fóru svo í morgun og ég bara strax sakna þeirra alveg helling. Þetta var alveg frábær heimsókn.